Основното јавно обвинителство Скопје поднесе обвинителен акт против в.д. директорот на ЈП „Комунална хигиена“ – Скопје и против управител за отпад во претпријатието. Тие се товарат дека како соизвршители сториле кривично дело „Загрозување на животната средина и природата со отпад“, дозволувајќи градот да се затрупа со смет во текот на октомври.
Според обвинителството, истрагата покажала сериозни пропусти во менаџирањето со отпадот, што резултирало со потенцијална опасност по здравјето на луѓето и животната средина.
Директорот не ги почитувал одлуките на Управниот одбор
Обвинителството тврди дека првиот човек на претпријатието постапил спротивно на Статутот и Законот за комунални дејности.
„Не ги спроведувал одлуките и заклучоците на Управниот одбор, не се грижел за спроведување на деловната политика, не ги извршувал работите од неговиот делокруг и не учествувал во утврдување на критериумите за управување со средствата“, се наведува во обвинението.
Дополнително, тој се товари дека иако бил должен, не обезбедил постојано и квалитетно давање на комуналната услуга и не се грижел за одржување на механизацијата (објектите, опремата и уредите) во исправна состојба.
Свесно не го собирале отпадот
Вториот обвинет, вработен како Управител за отпад (со положен стручен испит), се товари дека заедно со директорот, со умисла постапувале спротивно на законите.
- Не презеле мерки за заштита на животната средина.
- Не ги спроведувале плановите за управување со комуналниот отпад во Скопје.
- Не побарале измена на Оперативниот план кога виделе дека не можат да постигнат.
Резултатот од ваквото постапување беше создавање на диви депонии на јавни и сообраќајни површини и натрупување на смет во непосредна близина на контејнерите.
Обвинителството бара мерки на претпазливост наместо притвор
Бидејќи истрагата е завршена и доказите се прибрани, јавниот обвинител предложил мерката притвор да им биде заменета со благи мерки:
- Забрана за напуштање на живеалиште.
- Обврска за повремено јавување во суд.
- Одземање на патна исправа.
За обвинетиот управител со отпад, кој сè уште е вработен во ЈП „Комунална хигиена“, побарана е и дополнителна мерка – забрана за вршење на работни активности поврзани со кривичното дело, односно негово привремено отстранување од работното место.
