Општина Кичево упати јавен повик до сите физички лица кои издаваат куќи, станови, соби или апартмани за ноќевање, задолжително да го легализираат своето работење. Од локалната самоуправа предупредуваат дека граѓаните мора да ги регулираат своите објекти согласно Законот за угостителска дејност, во спротивно ќе се соочат со казни.
Постапка за легализација во два чекори
За да можат легално да издаваат објекти за ноќевање, сопствениците треба да поминат низ законски утврдена процедура која се состои од следниве чекори:
- Упис во Регистарот: Најпрво, граѓаните треба да поднесат барање до Општината за упис во Регистарот за угостителска дејност.
- Категоризација на објектот: Откако ќе добијат Решение од градоначалникот за извршениот упис, сопствениците мора да поднесат и второ барање – за категоризација на објектот за сместување.
- Теренски увид: За оваа намена е формирана надлежна општинска комисија која ќе изврши увид на самото место. Врз основа на нејзиниот извештај, градоначалникот донесува конечно Решение за извршена категоризација на објектот.
Строги санкции за работа на црно
Од Општина Кичево испраќаат јасно предупредување до сите кои работат надвор од законските рамки. Сите физички лица кои ќе бидат затекнати како вршат дејност на издавање објекти за ноќевање без претходно обезбедени соодветни решенија, ќе бидат строго санкционирани согласно важечките закони и прописи.
За сите дополнителни прашања, насоки и подетални информации за потребната документација, заинтересираните граѓани можат да се обратат директно во просториите на Општина Кичево, во канцеларија број 27 (Инспекторат).
