Кризата во новинарството не е само македонски проблем, туку глобален тренд, смета Сашо Ордановски, кој предупредува дека намалувањето на интересот на публиката и ресурсите влијаат врз квалитетот на медиумите.
Во разговор за „Ноќно Студио“ на 4ТВ.мк, Ордановски посочи дека и развиените демократии се соочуваат со пад на квалитетното новинарство.
„Тоа се случува во светот и во развиените демократии. Постојат медиуми кои сè уште ги почитуваат стандардите, но тие се малку“, рече тој.
Според него, ситуацијата е особено сложена во земји со помал број говорители на јазикот, каде што медиумите имаат ограничена публика.
„Публиката е сè помала и сè понезаинтересирана, и тоа е резултатот со кој се соочуваме“, оцени Ордановски.
Тој додаде дека медиумите се принудени да се борат со економски ограничувања, додека технологијата дополнително ја менува професијата.