Централниот штаб на ДУИ донел одлука да ги откаже сите изборни активности на лидерот Али Ахмети за утре, петок и последен ден од изборната кампања.
Одлуката за откажување на активностите е бидејќи Ахмети го потврдил своето учество на севкупниот национален протест во Тирана – во поддршка на неговите соборци и основачи на славната Ослободителна војска на Косово (УЧК).
Ова на пред конференција го изјави потпретседателот на ДУИ, Арбер Адеми кој вели дека овој чин е акт на национална солидарност, но и потсетник за оние што забораваат дека слободата и правата не се подаруваат – тие се освојуваат со жртвување.
„Во текот на оваа кампања, Националната алијанса за интеграција настапи достоинствено, смирено и со конкретна понуда за граѓаните. Не се занимававме со клевети, црни кампањи или манипулации. Зборувавме со јазикот на фактите, визијата и одговорноста. Нашата кампања ја изградивме врз довербата – не врз стравот. За жал, нашите противници ја избраа спротивната насока – патот на клеветите, фабрикувањата и темните сценарија. Наместо идеи – понудија лаги; наместо проекти – измислија скандали; наместо натпревар за развој – поттикнаа поделби. Од самиот почеток, самиот премиер изјави дека „суштината на овие избори е исчезнувањето на ДУИ од политичката сцена“, а потоа зборуваше и за „политичко пензионирање на Али Ахмети“. Тоа не е само политички речник – тоа е носталгија за време кога Албанците требаше да бидат под команда, а не рамноправни учесници во одлучувањето. Но тоа време заврши. Албанците никогаш повеќе нема да бидат васали на туѓа волја“, додаде Адеми.
Како што вели, во оваа кампања, се раѓа нов завет – завет на надежта, достоинството и враќањето на довербата во силата на народот.
„Граѓани од сите слоеви, па дури и поранешни поддржувачи на ВРЕДИ, ни се приклучуваат и отворено велат: Се надевавме на промени, но завршивме во разочарување и понижување.“ 19 октомври не е само датум на избори – тоа е референдум! Референдум за враќање на достоинството, за еднаквост, напредок и правда. На 19 октомври Албанците ќе зборуваат јасно – самите ќе ги изберат своите политички претставници, а не оние назначени од Мицкоски и неговата оска. Ова е наш момент на обединување, наш момент да го завериме со глас достоинството, еднаквоста и европскиот правец на државата. Кампањата завршува, но нашиот пат дури сега започнува. Патот на Националната Алијанса за интеграција е пат на правдата, достоинството и единството – пат што никој не може да го сопре, бидејќи тоа е патот на народот“, порача Адеми.
