Цената на нафтата бележи значителен пад, додека европските берзи растат по најавите за можни преговори меѓу САД и Иран за ставање крај на конфликтот на Блискиот Исток.
Според најновите податоци од берзите, утринава околу 9:30 часот цената на суровата нафта падна за 6,02 отсто и изнесуваше 86,775 долари по барел. Во исто време, цената на нафтата Брент се намали за 5,82 проценти, спуштајќи се на 97,728 долари за барел, односно под психолошката граница од 100 долари.
Позитивните движења на пазарите доаѓаат по информациите дека се интензивираат дипломатските напори за решавање на кризата. Весникот The New York Times, повикувајќи се на неименувани американски официјални лица, објави дека САД испратиле до Иран предлог со 15 точки, насочен кон прекин на конфликтот.
Веста за можен дипломатски пробив внесе оптимизам кај инвеститорите, кои очекуваат стабилизирање на енергетските пазари и намалување на притисокот врз глобалната економија.
