Врвот Пелистер на планината Баба денеска побеле од снег, информираа од Јавната установа Национален парк „Пелистер“. На надморска височина од 2.601 метар, наглото заладување и променливото време го претворија дождот во снежни врнежи.
Од националниот парк истакнуваат дека ова е уште еден доказ за моќта и непредвидливоста на Пелистер, кој со право го носи епитетот „крал на планините во Македонија“. Фотографијата која го посведочи овој редок летен феномен е направена од вработените во пунктот на ЈП „Национална радиодифузија“, лоциран на самиот врв.
Овој студен бран донесе енормен пад на температурите и во подножјето на планината. Имено, додека вчера во Битола во 17:00 часот беа измерени пријатни 26°C, денеска во истото време термометрите покажаа само 12°C, со тенденција на дополнително опаѓање.