Повеќе од 10 000 луѓе го напуштиле Санторини вчера, откако стотици земјотреси го потресоа островот, соопшти весникот „Катимерини“, пренесува БТА.
Не сите кои го напуштиле островот се негови жители – мал дел од нив се посетители. Постојаните жители бројат 15 231 лице според последното попишување на населението, што значи дека поголемиот дел од нив одбрале да го напуштат островот.
Од сабота до вторник попладне се регистрирани повеќе од 50 потреси со магнитуда помеѓу 4 и 5 според Рихтеровата скала и стотици со магнитуда помеѓу 3 и 4. Најсилните земјотреси биле со магнитуда од 5, 4,8 и 4,7 степени според Рихтеровата скала, бележи АНА-МПА.
„Ова е полошо од 1956 година“, изјави една постара жена за „Катимерини“, мислејќи на земјотресот со јачина од 7,7 степени според Рихтеровата скала што во тоа време го потресе соседниот остров Аморгос. „Јас го преживеав тоа. Двапати не потресе и тоа беше тоа. Сега сме повеќе исплашени – по цел ден очекувате да падне карпа во секој момент“.
Стрмните карпи се карактеристични за Аморгос, Санторини и други острови во тој регион, забележува изданието. Засега потресите предизвикале неколку урнатини на камења, но не нанеле големи штети.
Локалните власти донесоа трет пакет превентивни мерки. Откако училиштата беа затворени до петок, а на хотелите им беше препорачано да ги испразнат базените, властите препорачуваат на локалните жители и туристите да избегнуваат напуштени згради и да бараат безбедни патишта за движење, особено во региони каде што се можни свлечишта.
Повеќе од 2500 земјотреси се регистрирани во вулканскиот регион на Санторини и Аморгос од јуни 2024 до 1 февруари 2025 според податоци од Универзитетот во Атина.
Грчки експерти уверуваат дека потресите не се поврзани со познатиот подводен вулкан близу Санторини. Едно од најсилните ерупции на вулканот во 1600 година пр. н.е. го формирало островот во неговиот сегашен облик. Последната ерупција била во 1950 година.
