Македонските компании наскоро ќе можат побрзо да извезуваат и увезуваат стока од и кон Бугарија. Ова е резултат на новиот Меморандум за електронска размена на податоци, кој денеска беше потпишан во Брисел, а чија цел е целосна функционалност на концептот „Зелени ленти“.
Директорот на Царинската управа, Бобан Николовски, кој присуствуваше на неформалниот состанок на генералните директори на царинските управи во организација на Секретаријатот на ЦЕФТА, истакна дека овој чекор е доказ за довербата на Европската Унија во системот што го гради Македонија.
Податоците ќе стигнуваат пред камионите
Клучната новина што ја носи овој договор е тајмингот на информациите. Според Николовски, системот ќе овозможи царинските служби да ги добијат податоците за товарот уште пред стоката физички да пристигне на граничниот премин.
„Наша заедничка одговорност е добрите концепти да ги претвориме во целосно функционални системи во пракса. Меморандумот за електронска размена на податоци со Бугарија е доказ за нашата силна посветеност за подобрување на системот на ’зелените ленти‘ преку електронска размена на податоци уште пред стоката да пристигне на граница“, истакна Николовски во своето обраќање.
Клуч за конкурентност и добрососедство
Николовски потенцираше дека непречениот проток на стока не е само техничко прашање, туку е од суштинско значење за зајакнување на конкурентноста на домашните компании и за градење поголема доверба меѓу соседите.
На состанокот во Брисел, на кој присуствуваа и претставници од Транспортната заедница, се дискутираше за следните чекори во спроведувањето на овие меморандуми, како и за стратешкото проширување на иницијативата „Зелени ленти“ помеѓу земјите од ЦЕФТА и Европската Унија.
