Редакцијата на престижниот американски весник „Њујорк тајмс“ во петокот го повика претседателот Џо Бајден да се повлече од трката за Белата куќа по неговата катастрофална дебата против Доналд Трамп.
Во едиторијалот објавен во петокот вечерта со наслов „За да и служи на земјата, претседателот Бајден мора да ја напушти трката во Белата куќа“, Њујорк Тајмс го опиша Бајден како „лидер во сенка“, откако 81-годишниот претседател „падна на сопствениот испит “, пренесува „Јутарњи лист“.
Непрепознатлив, Бајден ги замати зборовите, не заврши одредени реченици и зјапаше празно за време на телевизиската дебата во четвртокот против неговиот републикански претходник и ривал на изборите во ноември.
„Бајден беше восхитувачки претседател. Под негово водство, земјата тргна напред и почна да се соочува со голем број долгорочни предизвици, а раните што ги отвори Трамп почнаа да зараснуваат. Но, најголемата услуга што Бајден би можел да и ја пружи на јавноста денес би била да објави дека нема да се кандидира за реизбор“, напиша „Тајмс“.
Редакцијата на „Тајмс“ е составена од реномирани уредници и треба да ги одразува вредностите на медиумите, забележува „Јутарњи лист“.
Членовите на Демократската партија, исто така, ја доведуваат во прашање способноста на Бајден да преземе нов мандат, што предизвика бура во партијата, но претседателот во петокот рече дека може „да ја заврши работата“, добивајќи поддршка од двајца негови претходници, Барак Обама и Бил Клинтон.
Трамп: Возраста на Бајден не е проблемот, туку неговата способност
Републиканскиот претседателски кандидат Доналд Трамп изјави дека проблемот со неговиот ривал, демократскиот кандидат Џо Бајден, не е неговата возраст „туку неговата способност“.
– Дали некој синоќа гледаше нешто што се вика дебата? Победивме човек кој навистина сака да ни ја уништи земјата – рекол Трамп во Вирџинија за Бајден, нарекувајќи го „корумпиран и неспособен“, пренесува CBS.
Како што објавија медиумите, настапот на претседателот во дебатата вознемири многу демократи, а дебатата дојде во време кога многу Американци веруваат дека Бајден, кој сега има 81 година, можеби е премногу стар за да ја води земјата уште четири години.
Трамп, исто така, ги отфрли медиумските извештаи дека демократите би можеле да се обидат да го заменат Бајден на билетот, сугерирајќи дека внатрешните анкети од неговата кампања покажуваат дека тој е најдобриот од сите потенцијални демократски кандидати.
