Вишото јавно обвинителство во Белград поднесе обвинителен акт против тројца обвинети за пропусти во техничкиот надзор на работите извршени на железничката станица во Нови Сад, што придонесе за пад на настрешницата во која загинаа 15 лица.
Во однос на двајца членови на Комисијата за технички надзор на работите, истрагата е прекината поради недостиг на докази, изјави главниот обвинител на Вишото јавно обвинителство во Белград, Ненад Стефановиќ.
Обвинението е поднесено за сторени коруптивни кривични дела. Обвинети се Слободанка К., Милутин С. и Билјана К.
Главниот јавен обвинител на Вишото јавно обвинителство во Белград, Ненад Стефановиќ, се обрати до јавноста по обвинението за пропустите кои доведоа до пад на настрешницата во Нови Сад.
Подигнато е обвинение против Слободанка К., менаџерката за развој на инвестиции во акционерското друштво Инфраструктура Железници Србија со седиште во Белград, како и претседателот на комисијата за технички преглед на железничката станица во Нови Сад, Милутин С., и членката на таа комисија, Билјана К. Тие се обвинети за кривични дела со коруптивни елементи, кои резултирале со уривање на настрешницата“, изјави Стефановиќ.
„Нивните пропусти придонесоа за трагедијата“
Стефановиќ прецизираше на што се однесуваат обвиненијата:
„Укажуваме на основано сомнение дека нивните пропусти придонесоа за оваа трагедија. Доколку постапувале совесно, извршиле вонреден преглед и контрола на исполнетоста на условите за време на пробната работа, ќе можеле визуелно да ги забележат знаците на пукнатини и зголемено виткање на настрешницата во деновите пред нејзиното уривање“.
Слободанка К. се соочува со обвинение за злоупотреба на службената положба и тешко дело против општата безбедност, додека на Милутин С. и Билјана К. им се става на товар несовесно работење во службата и тешко дело против општата безбедност, според Кривичниот законик.
Обвинителството ја обустави истрагата против две членки на комисијата
Обвинителот исто така наведе дека истрагата е обуставена против членките на комисијата, Јелена В. и Марија Н.Ј., поради недостаток на докази дека сториле какво било кривично дело кое се гони по службена должност.
„Во текот на истрагата, од исказите на обвинетите сведоци и прегледаната писмена документација објавена на веб-страницата на Владата на Република Србија, утврдено е дека Јелена В. и Марија Н.Ј. биле доведени во заблуда од страна на обвинетите членови на комисијата за извршениот технички преглед, што ја исклучува противправноста на нивното постапување“, објасни Стефановиќ.
Стефановиќ понатаму го нагласи коруптивниот елемент во овој случај, кој се огледа во неизвршување на надзорот и кривичните дела како што се злоупотреба на службената положба и несовесно работење во службата, кои се во причинско-последична врска со тешко дело против општата безбедност.
Предистражна постапка за финансирањето на проектот
Вишото јавно обвинителство во Нови Сад исто така поднесе обвинение против други обвинети лица за тешко дело против општата безбедност од областа на т.н. општ криминал. Јавното обвинителство за организиран криминал води предистражна постапка во врска со финансирањето на проектот за реновирање на железничката станица во Нови Сад, иницирана од Управата за криминалистичка полиција.
„Предистражната постапка започна по иницијатива на Управата за криминалистичка полиција“, додаде Стефановиќ.
„Посебното одделение за сузбивање на корупцијата при Вишото јавно обвинителство во Белград издаде барање за собирање потребни информации во врска со финансирањето на овој проект, имајќи предвид дека одредени компании имаат седиште на територијата на градот Белград. По ова, Посебното одделение за сузбивање на корупцијата во Нови Сад започна со своето постапување.“
Иако денешните обвиненија од Вишото јавно обвинителство во Белград не се поврзани со финансирањето на проектот, Стефановиќ истакна дека деталите од обвинението наскоро ќе бидат објавени на веб-страницата на обвинителството, заедно со доказите што ги собра обвинителството.
Стефановиќ исто така го спомена неправосилното решение за супституција во овој предмет, донесено од врховната јавна обвинителка, на кое Посебното одделение за сузбивање на корупцијата при Вишото јавно обвинителство во Белград поднесе приговор до Комисијата на Високиот совет на обвинителството.
„Сметам дека обвинителството кое ја водеше истрагата и го поднесе обвинението треба да го застапува истото тоа обвинение пред надлежниот суд заради ефикасноста на постапката“, рече Стефановиќ.
„Не е јасно зошто Јавното обвинителство за организиран криминал, кое сè уште е во предистражна фаза во врска со финансирањето на проектот, би го застапувало ова обвинение. Имајќи ја предвид трагедијата од 1 ноември минатата година во Нови Сад и општествените околности што следуваа, Вишото јавно обвинителство во Белград го даде својот максимум во ефикасното реагирање во однос на сомнежите за извршени кривични дела и процесуирањето на одговорните во делот што спаѓа во наша надлежност“, заклучи Стефановиќ.
