Подната фонтана на плоштадот „Македонија“ во Скопје повторно се става во функција по години запоставеност. Фонтаната е пуштена во пробна работа, а во тек се технички проверки и нагодувања, информира градоначалникот на Град Скопје, Орце Ѓорѓиевски.
Тој соопшти дека паралелно продолжуваат и редовните акции за темелно чистење на плоштадот, со цел уредување и зачувување на еден од најпрепознатливите простори во центарот на главниот град.
Според Ѓорѓиевски, по завршувањето на проверките, фонтаната треба повторно да стане место за детска радост, средби и создавање спомени, како и препознатлив симбол на Скопје.
Градоначалникот најави дека просторот на подната фонтана повеќе нема да се користи како премин за автомобили и тешки товарни возила.
„Плоштадот им припаѓа на граѓаните и така ќе остане“, порача Ѓорѓиевски.
Тој нагласи дека одржувањето на плоштадот нема да биде еднократна акција, туку континуирана обврска, додавајќи дека обновата на јавните простори бара и нивно редовно одржување.
Ѓорѓиевски посочи дека плоштадот „Македонија“ и Камениот мост се важни обележја на градот и дека нивното зачувување е одговорност на сите.