Рано утрово безбедносните сили започнаа обемна координирана операција на повеќе локации низ државата, насочена кон сузбивање на организираниот криминал. Засилено полициско присуство и специјални единици беа забележани во неколку градови, што укажува на сериозноста на акцијата.
Според неофицијални информации, Бирото за јавна безбедност при МВР, во соработка со Основното јавно обвинителство за гонење организиран криминал и корупција, спроведува масовна акција против организирана криминална мрежа.
Активностите се одвиваат на повеќе локации во Скопје, Штип, Струмица, како и во скопското село Грчец. Мета на операцијата е група поврзана со нелегална трговија со кокаин.
Досега, според истите извори, извршени се претреси на околу петнаесет локации, а полицијата привела повеќе лица за кои се сомнева дека се дел од криминалната структура. Неофицијално, меѓу приведените се споменуваат лица со презимиња Покрајчевалиев, Бојаџиски и Коцев, како и лице познато под прекарот „Бикот“.
Од надлежните институции засега нема официјална потврда за деталите од акцијата, а се очекува повеќе информации во текот на денот.
