Западните медиуми шпекулираат дека Принцот Хари пишува мемоари за неговиот живот во кралското семејство во Велика Британија.
Според нив, Хари веќе една година работи на мемоарите и веќе издавачот е избран.
Се верува дека британскиот принц ги продал авторските права на „Пенгвин рандом хаус“. Хари, исто така, избрал и професионален консултант за овој негов потфат.
Се работи за новинарот и писател Џ. Морингер, добитник на Пулицеровата награда, и автор на мемоарите на тениската легенда Андре Агаси.
Ракописот треба да биде доставен до издавачот во август, но секако овој рок може и да се одложи за октомври, со оглед на тоа дека принцот Хари штотуку стана по втор пат татко на ќерката Лилибет Дијана.
Во неговиот првичен облик, проектот е веќе завршен.
Книгата ќе раскажува за неговиот живот од детството до денеска, вклучувајќи ја и неговата служба како војник, што го однесе двапати во Авганистан. Хари денеска, како што вели, наоѓа среќа и мир во неговата сопруга Меган и нивните две деца – двегодишниот Арчи и новороденчето Лилибет Дијана.
Според познавачи, принцот Хари ќе ја искористи оваа можност за конечно да ја раскаже својата страна на историјата. Еден начин да го направи тоа, беше интервјуто кај Опра, кое според многумина, беше шокантно…
Објавувањето на идниот бестселер во најава, е закажано за крајот на 2022 година.
