Градежните активности за поврзување на улицата „Љубљанска“ со улицата „Скупи“ се одвиваат со забрзана динамика и проектот веќе влегува во својата финална фаза, информираше градоначалникот на Скопје, Орце Ѓорѓиевски.
Според Ѓорѓиевски, овој инфраструктурен зафат е од клучно значење за сообраќајната функционалност во овој дел од градот.
„Наскоро, овој важен мост на реката Вардар ќе биде ставен во функција. Со неговото отворање ќе овозможиме многу подобро, побрзо и пред сè побезбедно движење за сите скопјани“, истакна градоначалникот преку социјалните мрежи.
Тој потенцираше дека фокусот на градската администрација во овој период е ставен на откочување на заглавените проекти и интензивирање на активностите на терен. Целта на овие зафати е долгорочно подобрување на функционалноста на градот и намалување на сообраќајниот метеж преку нови и модерни решенија.