Триесетгодишниот Р.Т. од Скопје е уапсен синоќа (26.10.2025) во скопската населба Чаир, откако полицијата го затекнала со пиштол непосредно по пријава за пукање во реонот.
Според официјалните информации од СВР Скопје, апсењето се случило околу 20:00 часот на улицата „Дижонска“.
На акцијата ѝ претходела пријава од граѓани, која стигнала во СВР Скопје околу 19:45 часот. Во пријавата било наведено дека на пошироката територија на Чаир се слуша пукање од огнено оружје, што предизвикало вознемиреност кај локалното население.
Веднаш по добиената пријава, полициски службеници презеле соодветни мерки и активности за пронаоѓање на сторителот. Набрзо, на улицата „Дижонска“, тие го лоцирале и го лишиле од слобода Р.Т. (30), кој бил затекнат со пиштолот што, најверојатно, бил користен во инцидентот.
Од Министерството за внатрешни работи информираат дека по целосно документирање на случајот, против Р.Т. ќе биде поднесена соодветна пријава според членот 396 од Кривичниот законик, кој се однесува на „недозволено изработување, држење, посредување и тргување со оружје или распрскувачки материи“.
