Мега-ракетата „Старшип“ од компанијата „Спејс Икс“ на мултимилијардерот Илон Маск експлодираше за време на рутински тест во „Старбејс“ во Тексас, без повредени, објавија локалните власти во четврток.
„Во среда во 23:01 часот по локално време, за време на рутинско статичко тестирање во Старбејс, Тексас, „Старшип 36“ на „Спејс Икс“ доживеа катастрофален дефект и експлодираше“, соопштија властите на округот Камерон, Тексас, на нивната Фејсбук страница.
„За среќа, досега не се пријавени повредени“, рекоа тие. „Протоколите за итни случаи беа брзо имплементирани и во тек е истрага за да се утврди причината за инцидентот.“
„Спејс Икс“ исто така потврди дека дошло до несреќа.
„Старшип, кој се подготвуваше за својот десетти тест лет, доживеа голема аномалија додека беше на тест-локацијата во „Старбејс“, напиша компанијата во порака на X, додавајќи дека „безбедносната зона околу локацијата беше одржувана во текот на целата операција“ и дека „сиот персонал е безбеден и здрав“.
„Нашиот тим на Starship активно работи на обезбедување на местото за тестирање и неговата непосредна околина во соработка со локалните власти“, додаде компанијата, уверувајќи дека „нема опасност за жителите“.
Ова не е прв неуспех на оваа ракета, со големина на зграда од околу 40 ката и најмоќната во историјата. Минатиот месец, на 27 мај, Starship успешно стигна до вселената, но нејзиното вселенско летало експлодираше пред планираното спуштање на Земјата.
За време на двата претходни тестови во јануари и март, горниот дел експлодираше на почетокот на летот, а црвено-жешките остатоци беа разнесени над Карибите, предизвикувајќи минимална штета.
Овие инциденти се случуваат редовно, бидејќи компанијата на Елон Маск се потпира на ризична стратегија: лансирање повеќе прототипови за постепено да се исправат проблемите што се појавуваат за време на летот.
Технолошкиот магнат смета на оваа мега-ракета за да го спроведе својот амбициозен проект за освојување на Марс.
Елон Маск се етаблираше како клучен играч во вселенскиот сектор во последните години. Вашингтон ѝ довери неколку клучни мисии во областа, но иднината на тоа партнерство сега е неизвесна по неговата подеднакво експлозивна разделба со претседателот Доналд Трамп.
Нејзините ракети носат астронаути на НАСА во вселената, служат за високо чувствителни мисии на Пентагон и наскоро би можеле да играат централна улога во долгоочекуваното враќање на Американците на Месечината.
