Поранешната потпретседателка на Собранието Фросина Ременски го претрка собранискиот спикер Талат Џафери. Таа попладнево рече дека иницијативата на ВМРО-ДПМНЕ за референдум е противуставна.
„Како поранешен Потпретседател на Собранието на РСМ и дел на Претседателството кое заседавало за многу важни државнички прашања од интерес за иднината на граѓаните и државата имам став околу референдумската иницијатива и правецот во кој треба да се одлучува за истата. Претседателот на Собранието на РСМ, знае дека оваа иницијатива во основа е противуставна и спротивна на стратешките интереси на РСМ дефинирани во временски интервал од 30 години и со надпартиски и наднационален интерес – полноправно членство во ЕУ и НАТО“, вели Ременски.
Таа додава дека Претседателот на Собранието на РСМ е дел од уставниот поредок и еден од повиканите да се грижи за заштита на уставниот поредок и стратешките интереси на државата.
„А тоа значи дека, оценката за целта на иницијатива за референдумско изјаснување на граѓаните против стратешките интереси на државата, националната и регионалната безбедност е одговорност на сите три власти за грижата и заштитата на уставниот поредок и интересите на државата“, додава Ременски.
„Претседателот на Собранието на РСМ нема обврска само формално-правно да ја оценува референдумската иницијатива, туку да навлезе во целите и ефектите од истата, односно да оцени дали периодот, ресурсите, реториката, дејствијата и целиот процес се во прилог на европската иднина, политичката стабилност и стратешките интереси на државата, или пак, билет за партиска мобилизација и тригер за етнонационализам кој ќе не дефокусира од европскиот пат на интеграции“, вели Ременски.