Нападот со руски дрон предизвика значителна штета на засолништето за радијација на нуклеарната централа Чернобил во текот на ноќта, изјави денеска украинскиот претседател Володимир Зеленски, пишува Ројтерс.
Чернобил е местото на најголемата цивилна нуклеарна катастрофа во светот, кога еден од четирите реактори експлодираше во 1986 година. Тој реактор сега е покриен со заштитно засолниште, познато како саркофаг, за да се спречи ширењето на преостанатото зрачење.
Рускиот дрон го погоди засолништето на уништениот реактор во електраната, предизвикувајќи пожар кој во меѓувреме е изгаснат, рече Зеленски.
„Во моментов нивото на радијација не е зголемено и постојано се следи“, додаде тој, нагласувајќи дека првичната проценка покажала значителна штета.
„Единствената земја во светот која напаѓа такви постројки, окупира нуклеарни централи и води војна без никакво внимание на последиците е денешна Русија“, рече Зеленски.
