Стапката на сиромаштија во Македонија во 2024 година изнесувала 21,9 проценти, покажуваат податоците на Државниот завод за статистика, добиени од Анкетата за приходите и условите за живеење, спроведена според стандардите на Европската Унија.
Прагот на сиромаштија е утврден на 60 проценти од медијалниот еквивалентен приход. Анализите по тип на домаќинства покажуваат дека најмал ризик од сиромаштија имаат семејствата составени од двајца возрасни со две издржувани деца, каде стапката изнесува 17,1 процент.
Според економскиот статус, најзаштитени се вработените лица, со стапка на сиромаштија од 7,9 проценти. Пензионерите, и понатаму, остануваат една од поранливите категории, со стапка од 12 проценти. Коефициентот на Џини, кој ја мери нееднаквоста во распределбата на приходите, изнесува 29,1 процент.
Податоците од изминатите години укажуваат на постепено намалување на сиромаштијата. Во 2023 година стапката изнесувала 22,2 проценти, во 2022 година 22,9 проценти, додека во 2021 година достигнувала 23 проценти.
Најголем ризик од сиромаштија и натаму имаат домаќинствата со повеќе издржувани деца, како и лицата со ниски приходи и пензионерите, кои се најизложени на економски шокови.
Иако се забележува благо подобрување, податоците за 2025 година сè уште не се објавени. Статистиката укажува на потреба од континуирани и таргетирани политики за намалување на сиромаштијата и економската нееднаквост, со посебен фокус на најранливите категории граѓани.
