Кина утрово ги повика САД да се вратат „на правиот пат на мултилатералниот систем“ на трговија, откако Вашингтон воведе царини за увоз на алуминиум и челик.
Портпаролот на кинеското Министерство за трговија на редовна прес-конференција рече дека американскиот пристап кон царините е типичен чин на унилатерализам и протекционизам, како и сериозно нанесување штета на правата и интересите на сите земји.
Портпаролот истакна дека воведувањето на американските царини ја поткопува мултилатералната трговија заснована на правила, објави Ројтерс.
На 10 февруари, американскиот претседател Доналд Трамп воведе царини за увоз на челик и алуминиум во САД без никакви исклучоци.
Медиумите објавија дека ова е нова фаза од трговската војна што американскиот претседател ја води против остатокот од светот.
