Северна Кореја испали балистичка ракета источно од својот брег, соопштија Јужна Кореја и Јапонија.
Јужнокорејската војска соопшти дека станува збор за ракета со краток дострел лансирана од северозападниот регион на земјата, во близина на кинеската граница. Ракетата прелетала околу 700 километри, а јужнокорејските и американските системи за надзор ги детектирале подготовките за лансирање и ја следеле ракетата за време на нејзиниот лет.
Информациите биле споделени и со Јапонија, чија влада соопшти дека ракетата веројатно паднала надвор од ексклузивната економска зона на Јапонија.
Претседателот на САД, Доналд Трамп, ја посети Јужна Кореја минатата недела, каде што изрази подготвеност повторно да се сретне со севернокорејскиот диктатор Ким Џонг Ун. До последен момент се веруваше дека средбата може да се одржи за време на азиската турнеја на Трамп, но средбата не се одржа. Сепак, Трамп рече дека е подготвен повторно да го посети регионот за да се сретне со Ким.
Северна Кореја минатиот месец лансираше неколку ракети со краток дострел, вклучувајќи една за која рече дека е суперсонична, пред посетата на Трамп и кинескиот претседател Си Џинпинг на нејзиниот јужен сосед.
Еден ден пред последното лансирање, Министерството за надворешни работи на Северна Кореја соопшти дека администрацијата на Трамп го „антагонизира“ Пјонгјанг со воведување санкции врз неговите институции и поединци поради наводно перење пари. Министерството најави одговор, но не прецизираше што ќе преземе.
