Македонија се соочува со сериозен проблем во водењето на националниот регистар за дијабетес. Димче Велев за 4tv.mk појасни дека постојните бројки на Институтот за јавно здравје се „комплетно дискредитирани“ и не се совпаѓаат со податоците од системот „Мој термин“ или меѓународните институции. Според него, во државата има околу 140.000 лица со дијабетес, но недостасуваат прецизни податоци за компликациите и новодијагностицираните случаи, што го прави планирањето на набавките речиси невозможно.
Поради овие недостатоци, пациентите се принудени да се снабдуваат од црниот пазар или да патуваат во Србија, Бугарија и Грција. „Една третина од домашниот буџет ни оди за помагала и терапија, а во соседните земји лековите се поевтини за најмалку една третина отколку во Македонија,“ изјави Велев за 4tv.mk. Тој нагласи дека купувањето сензори од странство е ризично бидејќи пациентите немаат никаква гаранција доколку уредот не функционира правилно.
