ВЛАСТИТЕ во источна и јужна Шпанија ги затворија училиштата и почнаа да евакуираат делови од населението бидејќи обилните дождови повторно ја погодија земјата, две недели по катастрофалните поплави во кои загинаа најмалку 215 луѓе и предизвикаа политичка дебата со меѓусебни обвинувања.
Утрово државната метеоролошка агенција Аемет објави портокалово предупредување за поголемиот дел од источна и јужна Шпанија, додека највисоко ниво на предупредување беше издадено за провинциите Тарагона во Каталонија и Малага во Андалузија.
Училиштата затворени, 3.000 луѓе евакуирани
Владата на Андалузија ги затвори училиштата во провинциите Малага и Гранада, а 3.000 луѓе беа евакуирани од населбите во близина на реката Гвадалхорсе во провинцијата Малага. Брзиот железнички превоз меѓу Малага и Мадрид беше прекинат попладнево.
Каталонските власти ги повикаа жителите да бидат „максимална претпазливост“, додека регионалната влада на Валенсија, која беше критикувана за справувањето со претходната катастрофа, ги советуваше општините во погодените области да ги затворат училиштата и препорача луѓето да работат од дома.
Во текот на денот, Аемет го зголеми предупредувањето за провинцијата Валенсија од портокалово на црвено.
Más imágenes del evento tornádico frente a la costa de #Marbella, hace escasos minutos.pic.twitter.com/v1h8zcevJB
— Storm Málaga (@Storm_Malaga) November 13, 2024
„Опасноста е екстремна“, објави Аемет на платформата X. „Избегнувајте движење бидејќи реките може да се поплават. Бидете многу внимателни!“ Беше предупредено дека во областа може да паднат 180 литри вода на метар квадратен во рок од четири до пет часа.
Армијата и полицијата се уште ја чистат Валенсија од последната катастрофа
Иако ова невреме не се очекува да биде силно како претходното, последиците би можеле да бидат тешки поради големото количество кал на теренот и оштетениот одводен систем.
Речиси 20.000 припадници на армијата и полицијата се уште се вклучени во расчистувањето во Валенсија, која беше најтешко погодена од поплавите пред две недели.
Victoria Street, Malaga, Spain….pic.twitter.com/KmjXrqCRpm
— Volcaholic 🌋 (@volcaholic1) November 13, 2024
Општина Чива, една од најтешко погодените области, ги откажа часовите и спортските активности додека работниците во блиската Алдаија положија вреќи со песок за да го заштитат градот.
„Ставаме вреќи со песок“, изјави за Ројтерс комуналниот работник Антонио Оједа.
Потрагата по исчезнатите се уште е во тек
Продолжува потрагата по телата на 23 лица кои се уште се водат како исчезнати по поплавите во октомври. Утрово спасувачите ги пронајдоа телата на двајцата мали браќа кои беа однесени од поројна вода во градот Торент во Валенсија. Рубен Матиас Калатајуд, три години и Изан Матиас Калатајуд, пет години, биле откорнати од рацете на нивниот татко.
Поплавите, кои се најголемата природна катастрофа во поновата историја на Шпанија, доведоа до судири меѓу регионалните и локалните власти и голем протест минатиот викенд.