Советниците на ЦДЦ со нови препораки за вакцинација против ковид-19

Советодавниот комитет за имунизација при Центрите за контрола и превенција на болести на САД (ЦДЦ) едногласно изгласа да се промени досегашната широка препорака за вакцинација против ковид-19. Од сега, лицата кои сакаат да примат вакцина ќе треба да се консултираат со лекар или друг здравствен работник – процес познат како „заедничко клиничко одлучување“.

Комитетот беше поделен околу прашањето дали за вакцината ќе биде потребен и лекарски рецепт. Гласањето заврши 6-6, а претседателот на комитетот, д-р Мартин Кулдорф, со својот „против“ глас ја прекина рамноправноста.

Препораките предвидуваат лицата над 65 години одлуката за вакцина да ја донесат заедно со својот лекар. Истото важи и за групата од 6 месеци до 64 години, но со посебен акцент дека најголема корист од вакцинацијата имаат лицата со зголемен ризик од тешка форма на ковид-19, според листата на ЦДЦ за ризик-фактори.

Препораките сè уште не се конечни – ќе треба да ги одобри вршителот на должност директор на ЦДЦ, Џим О’Нил.

Американската Управа за храна и лекови (ФДА) веќе донесе измени за оваа сезона, ограничувајќи ја вакцинацијата на возрасни над 65 години и лица со висок ризик.

Од Министерството за здравство на САД соопштија дека новиот пристап овозможува трошоците за имунизација да продолжат да бидат покриени преку сите здравствени програми, вклучително и Medicaid, Medicare и приватните осигурителни планови.