Советот на јавни обвинители денеска на седница ќе го разгледа предлогот за разрешување на државниот јавен обвинител Љупчо Коцевски. Ова е втора точка на дневниот ред на 22. седница, која досега двапати беше одложена – првично на 18 март поради националната жалост за трагедијата во Кочани, а потоа на 26 март поради недостаток на кворум.
Согласно законските рокови, Советот мора да го разгледа предлогот најдоцна до крајот на неделата, иако Владата најави дека ќе ја прекине постапката.
Портпаролката на Владата, Марија Митева, на 26 март изјави дека, доколку Советот донесе мислење за разрешување на Коцевски, Владата нема да го проследи до Собранието.
„Доколку добиеме мислење од Советот на ЈО, постапката ќе биде запрена и истото нема да се прати до Собранието. Секако, Советот на ЈО ќе постапува во рамки на законските рокови“, рече Митева.
„Имајќи ја предвид чувствителната ситуација во општеството, сметаме дека е потребно обвинителите, особено оние што работат на случајот во Кочани, да имаат можност да ја завршат својата работа. Досега, МВР и Обвинителството постигнаа значајни резултати, вклучувајќи обезбедување на 34 лица со можни поврзаности со случајот“, изјави Мицкоски.
Премиерот Христијан Мицкоски, по трагедијата во Кочани, исто така потврди дека постапката ќе биде запрена во тековната фаза.
Владата на 11 февруари поведе постапка за разрешување на Коцевски, кој беше назначен пред една година со мандат од шест години. Министерството за правда изготви Предлог-мислење за негово разрешување, постапувајќи по заклучок од 50-та владина седница.
Според Министерството, Коцевски постапувал во предмети во кои постоеле околности што предизвикуваат сомнеж во неговата непристрасност и судир на интереси, а тој требало да се изземе.
Коцевски ги негира овие тврдења, нагласувајќи дека постапувал согласно законот и роковите.
