Денеска Сојузот на синдикати на Македонија ја започна јавната седница на највисоките тела на Синдикатот пред Собранието, каде што беа упатени силни пораки до пратениците да донесат одлука за зголемување на минималната плата на 500 евра. Пред Собранието беше предложено пратениците да примаат минимална плата до наредното зголемување на минималната плата.
„Вашите 79% зголемени плати не ги заслужувате, и затоа денес дојдовме тука. Ние ќе донесеме одлука за вас, бидејќи вие не ги донесувате одлуките за нас. Да донесеме одлука пратениците да бидат на минимална плата до наредното зголемување на минималната плата“, изјави претседателот на ССМ, Слободан Трендафилов.
Седницата продолжи пред Стопанската комора на Северна Македонија и ќе заврши пред Владата.
На почетокот на протестот, пред Работничкиот дом во Скопје, работниците им одадоа почит на трагично загинатите во трагедијата во Кочани, преку едноминутно молчење.
Претходно денеска, министерот за економија и труд, Бесар Дурмиши, изјави дека одлуката за зголемување на минималната плата за 1.800 денари е донесена во согласност со законските прописи.
