Низ сите 50 сојузни држави на САД стотици илјади луѓе излегоа на улиците во повеќе од 1.400 протести изразувајќи незадоволство од политиките на американскиот претседател Доналд Трамп и милијардерот Илон Маск, кој раководи со новоформираниот Оддел за ефикасност на владата (ДОГЕ), јавуваат светските медиуми.
Според извештаите на Си-Ен-Ен и други медиуми, бројот на учесници се мери во милиони. Протестите беа организирани од продемократското движење и поддржани од над 150 активистички организации – од групи за човекови права и синдикати, до организации за правата на жените, ЛГБТК+ заедницата и ветерани.
Организаторите ги нарекоа демонстрациите одговор на, како што велат, „непријателското преземање“ и нападот врз демократските вредности, човековите права и слободи во САД. Протестите се одржаа пред федерални институции, канцеларии на Конгресот, социјални служби, како и на јавни плоштади и паркови низ државата.
Главните пораки од протестот беа насочени против:
-кратењето на работни места во федералната администрација,
-заканите кон социјалното осигурување и Medicare,
-депортацијата на мигранти,
-укинувањето на права на ЛГБТК+ заедницата,
-и, како што велат организаторите, уништувањето на демократските институции.
Некои демонстранти носеа украински знамиња во знак на поддршка за Украина, додека други покажуваа солидарност со Палестинците, носејќи кефии и транспаренти со пораки како „Слобода за Палестина“.
Од 28 март наваму, според Си-Ен-Ен, администрацијата на Трамп отпуштила над 121.000 вработени во федерални институции.
Од Белата куќа, помошничката на прес-секретарот Лиз Хјустон ги отфрли обвинувањата дека администрацијата планира кратење на социјалните програми, нарекувајќи ги „лажни и дезинформирачки“.
Додека протестите се распламтуваа, претседателот Трамп денот го мина на голф терен во Флорида.
Слични протести се одржаа и во повеќе европски градови, вклучувајќи Берлин, Франкфурт, Лондон и Лисабон, како знак на меѓународна солидарност против, како што се наведува, авторитарните тенденции на американското раководство.
