Поранешната министерка за внатрешни работи, Гордана Јанкуловска, денеска излезе со силна реакција откако Европскиот суд за човекови права (ЕСЧП) во Стразбур објави дека отвора сериозни прашања во врска со потенцијалните повреди на правото на правично судење во предметот „Тенк“. Иако таа веќе ја издржа затворската казна за набавката на блиндираниот „Мерцедес“, Јанкуловска смета дека потегот на Стразбур е потврда за „беззаконието и бескрупулозноста“ на претходните инсталации во правосудството.
На Фејсбук таа не штедеше критики кон судиите и обвинителите кои го водеа процесот против неа, нарекувајќи ја казната што ја издржа „неправедна и драконска“.
Стразбур ги „чешла“ повредите на постапката
Клучниот момент во реакцијата на Јанкуловска е информацијата дека ЕСЧП, по речиси пет години од поднесувањето на нејзината апликација, одлучил детално да ги разгледа документираните наводи за повреди во судскиот процес.
„Овие прашања не се само потврда на целото беззаконие и бескрупулозност на инсталациите на претходната власт во правосудството во однос на мене лично, туку и потврда дека токму тие инсталации беа најмоќната алатка за остварување на целите на таа влада,“ истакна Јанкуловска.
За неа, фактот што меѓународниот суд ги препознал овие повреди претставува „мала лична сатисфакција“, иако штетата на приватен и професионален план е веќе направена и ненадоместлива.
Директна порака до „оние со 2% доверба“
Поранешната министерка испрати остра порака до македонските судии и обвинители, алудирајќи на катастрофално ниската доверба на граѓаните во правосудниот систем.
„Можеби конечно оние со 2% доверба ќе ја примат пораката дека не смеат да слугуваат на ничии интереси и агенди, затоа што граѓаните ги плаќаат да ги штитат, а не да ги кршат нивните права,“ порача таа.
Обвинувања за наградени „злодела“
Во својата изјава, Јанкуловска директно прозива одредена личност од правосудството (без да именува, но алудирајќи на судијка инволвирана во нејзиниот случај), за која тврди дека е „на столбот на срамот“.
„Госпоѓата која денес е на столбот на срамот, а која за своите злодела беше од страна на претходната власт дебело наградена со висока функција, е пример дека судиската тога не е панцир што штити од општествен прекор,“ нагласи Јанкуловска.
Таа го заврши своето обраќање со надеж за идна одговорност за „сторените зла“, но и со уверување дека дури и да изостане правната санкција, никој не може да му избега на „судот на историјата“.
