Доналд Трамп и неговото семејство заработиле повеќе од 1,4 милијарди долари во првата година од неговиот втор мандат, објави „Њујорк тајмс“.
Уредничкиот одбор на „Њујорк тајмс“ забележа дека бројките може да бидат повисоки, бидејќи значителен дел од приходите на Трамп не се целосно јавно достапни.
Истрагата на американскиот дневен весник покажа дека семејството Трамп заработило најмалку 23 милиони долари само од лиценцирање на употребата на името Трамп во странство.
Првата дама Меланија Трамп ќе добие 28 милиони долари, кои „Амазон“ се согласи да ги плати за документарец за неа, кој наскоро ќе биде објавен во кината.
Технолошките и медиумските компании му донесоа на семејството Трамп приход од 90,5 милиони долари во разни штети и судски спогодби. Катар му обезбеди на Трамп авион од 400 милиони долари, кој американскиот претседател го користи како претседателски авион, „Ер Форс Уан“, и кој планира да го задржи по напуштањето на Белата куќа.
Најголемиот приход на семејството Трамп доаѓа од криптовалути. Трампови заработиле најмалку 867 милиони долари од нивните трансакции со криптовалути, а „Њујорк тајмс“ објави дека вкупниот износ може да биде многу поголем.
Ерик Трамп призна во интервју за „Фајненшл тајмс“ дека заработката на семејството од криптовалути веројатно ги надминува јавните проценки.
Вкупно, нето вредноста на Трамп по враќањето во Белата куќа е 16.822 пати поголема од просечното американско домаќинство, и покрај тоа што ја презеде функцијата како најбогат претседател во американската историја.
Организацијата Трамп моментално спроведува 20 проекти во странство, вклучувајќи луксузен хотел во Оман, деловна кула во Западните Инди и планирано голф игралиште во близина на Ријад, Саудиска Арабија.
Многу од овие проекти зависат од соработката со владите на тие земји и веќе донесоа милиони за семејството Трамп. Ројтерс пишува дека, во меѓувреме, американската влада презеде чекори во корист на овие земји.
Пример е намалувањето на царините што САД ги воведоа на Виетнам, само еден месец откако започна изградбата на голф-центар вреден 1,5 милијарди долари во близина на Ханој, кој се појавува под брендот Трамп. Од друга страна, виетнамските власти го протуркаа овој проект иако беше спротивен на локалниот закон.
Трамп ги тужи сите по ред и остварува добар профит од овие тужби. Спогодбите со компании како „X“, ABC News, Meta, YouTube и Paramount донесоа десетици милиони евра во вонсудски спогодби.
Во случајот со Трамп, давањето подароци и надворешната политика на претседателот беа отворено поврзани. Откако Катар му подари авион од 400 милиони долари, претседателот јавно понуди да ја заштити оваа држава од Персискиот Залив.
„Ќе ја заштитиме оваа земја“, рече Трамп за време на патувањето во Доха.
Криптовалути и напредни чипови за милијарди од Блискиот Исток
Ројтерс објави дека трансакциите со криптовалути на Трамп им овозможуваат на американските и странските инвеститори да инвестираат во дигитални средства поврзани со членови на семејството, отворајќи го патот за директни приливи на пари за Трампови.
Еден пример за таков бизнис е инвестициска фирма поддржана од Обединетите Арапски Емирати, која објави планови за инвестирање на 2 милијарди долари во компанија поврзана со Трамп. Оваа деловна одлука е донесена кратко пред американската администрација да го одобри пристапот на ОАЕ до напредни американски полупроводнички чипови.
Рас Батнер, истражувачки новинар на „Њујорк тајмс“, кој ги следи финансиите и бизнисот на Доналд Трамп во последните 20 години, изјави за Си-Ен-Ен дека оваа сума е повеќе од сè што заработил од неговото наследство, реалното шоу „Чиракот“ и лиценците „Чиракот“ во „златните денови“ на неговиот бизнис.
„Тие се отворени за бизнис и редовно се шират, особено во областа на криптовалутите. Ја трансформираа својата компанија за социјални медиуми во компанија за криптовалути, а сега ја трансформираат во некаков вид енергетска компанија. Тие се обидуваат да го зграбат секој можен бизнис за да профитираат од овој период“, рече истражувачкиот новинар на „Њујорк тајмс“.
Тој истакнува дека поголемиот дел од парите во секторот за криптовалути доаѓаат анонимно, од странство, а јавноста нема увид во тоа кои се инвеститорите. Тој додава дека инвеститорите често се од земји кои имаат одредени интереси во односите со Соединетите Американски Држави, како што се Емиратите.
„Тие (ОАЕ) избраа да ја користат криптовалутата на Трамп за да платат инвестиција од 2 милијарди долари. Во време кога валутата беше нова, недокажана и се бореше на пазарот. Тоа стави од 80 до 100 милиони долари во џебовите на Трампови“, истакна новинарот.
