Роман Лавринович е обвинет по три точки за подметнување пожар со намера да загрози човечки живот, во врска со серија инциденти поврзани со британскиот премиер Кир Стармер.
Лавринович беше уапсен во вторникот наутро во населбата Сиденхам, југоисточен Лондон, и се очекува утре да се појави пред Вестминстерскиот прекршочен суд.
Обвиненијата се однесуваат на три одделни пожари во период од четири дена:
- 8 мај – запалено возило поврзано со Кир Стармер во Кентиш Таун, северен Лондон.
- 11 мај – во раните утрински часови избувнал пожар на влезната врата од куќа претворена во станови во Ислингтон, каде што Стармер наводно живеел во 1990-тите.
- 12 мај – подметнат пожар на влезот од приватниот дом на Стармер на истата улица. Иако премиерот повеќе не живее таму, имотот и натаму е во негова сопственост и се изнајмува.
Полицијата соопшти дека е причинета материјална штета на влезовите на два објекти, но нема повредени лица. Противпожарната служба добила пријава за пожарот во Кентиш Таун на 12 мај во 1:35 часот по полноќ.
