Процесот за вработување на преостанатите 300 специјализанти, од вкупно 600 предвидени со одлука на Владата од 2024 година, повторно е активиран и треба да заврши до крајот на 2026 година, информираше министерот за здравство Сашо Клековски.
Тој посочи дека досега биле вработени 300 специјализанти, додека останатите не биле опфатени поради застој во спроведувањето на владината одлука.
„По одреден застој се откочи процесот за вработување на 600 специјализанти. Се доцнеше со спроведувањето на одлуката. Се вработија 300 специјализанти, а 300 останаа надвор од проектот. На вчерашната седница на Владата се донесе одлука повторно да се отвори процесот и тие 300 специјализанти што не беа вработени да се вработат до крајот на 2026 година“, изјави Клековски.
Министерот најави дека Министерството за здравство повторно ќе објави повик за изразување интерес, бидејќи во меѓувреме дел од специјализантите веќе се вработиле преку редовни процедури.
„Сакаме да видиме кој е интересот на специјализантите. Апсолутен приоритет ќе бидат општите и клиничките болници надвор од Скопје, како и специјализациите за профили каде што има недостиг на кадар“, рече Клековски.
Според него, со реализацијата на овој процес се очекува значително подобрување на достапноста на специјалисти во јавниот здравствен систем, особено во регионалните здравствени установи.