Хрватска продолжува да биде магнет за работната сила од регионот, но и од далечниот исток. Официјалните податоци на хрватското Министерство за внатрешни работи (МВР) за 4NEWS.mk откриваат дека од почетокот на годината до 30 ноември 2025 година, издадени се вкупно 160.176 дозволи за престој и работа. Северна Македонија котира високо на оваа листа, наоѓајќи се на шестото место според бројот на издадени дозволи.
Бројките потврдуваат дека егзодусот на македонски работници кон земјата-членка на ЕУ не запира. Само во првите 11 месеци од оваа година, 11.384 македонски државјани добиле дозвола за работа во Хрватска.
Босна и Непал на врвот, Србија трета
Најголемиот дел од странските работници во Хрватска доаѓаат од соседството, но сè поизразено е присуството на работници од Азија.
- Босна и Херцеговина е убедливо на првото место со 30.188 дозволи.
- Веднаш зад неа е Непал со 29.579 дозволи, што укажува на драматична промена во структурата на пазарот на труд.
- Србија е трета со 23.145 работници.
Меѓу топ 10 земјите се наоѓаат и Филипини, Индија, Косово, Египет, Узбекистан и Бангладеш.
Загреб и Истра – главни дестинации
Според податоците, најголем број дозволи се издадени во Загреб (40.170), што е очекувано со оглед на економската активност во главниот град. Следуваат Истарската жупанија со 22.824 и Сплитско-далматинската со 16.602 дозволи.
Интересно е што во Истра најголемиот месечен пораст на издадени дозволи е забележан во март, додека во Сплит и Далмација тој скок се случил во јуни, непосредно пред шпицот на туристичката сезона.
Структура на дозволите
Од вкупниот број издадени дозволи (160.176):
- 76.700 се за ново вработување;
- 64.009 се за продолжување на постојните дозволи;
- 19.467 се за сезонски работници.
Овие податоци јасно укажуваат дека Хрватска се соочува со сериозен недостиг на домашна работна сила, празнина која сè повеќе ја пополнуваат работниците од Западен Балкан, вклучително и од Македонија.
Топ 10 земји по број на издадени дозволи во Хрватска (2025):
- Босна и Херцеговина – 30.188
- Непал – 29.579
- Србија – 23.145
- Филипини – 16.195
- Индија – 14.500
- Северна Македонија – 11.384
- Косово – 5.860
- Египет – 5.149
- Узбекистан – 5.161
- Бангладеш – 3.183
