Целиот регион зборува околу фактот дека кит се појавил во Херцегновскиот Залив. Оваа информација ја потврди и Институтот за морска биологија во Котор. Како што велат, ова е ретка појава за овој дел од Јадранското Море, но не и без преседан.
-Најверојатно станува збор за единка што се изгубила за време на миграцијата. Китовите повремено се појавуваат во јужниот дел на Јадранското Море, главно во текот на потоплите месеци. Китовите биле таму и претходно, биле видени и тоа не е толку невообичаена појава – изјави за РИНА Илија Ќетковиќ од Институтот за морска биологија во Котор.
Во исто време, неодамна, рибарот Гојко Митровиќ, на 12 километри од црногорскиот брег, улови и пушти млада голема бела ајкула на длабочина од 115 метри. Овој вид, иако е познат по својата големина и предаторство, повремено се појавува во Јадранското Море.
– Големата бела ајкула е редок, но природен жител на Медитеранот. Нејзиното присуство во Јадранското Море не е нов феномен. Последниот регистриран инцидент со овој вид се случил во 2008 година во близина на островот Вис во Хрватска, без фатален исход. Примерокот што беше виден во Црна Гора е многу мал, нема причина за паника и страв, додава Ќетковиќ.
Експертите апелираат до граѓаните и туристите да се однесуваат одговорно додека се на море, особено во близина на рибарски чамци и во раните утрински часови кога морските животни се најактивни. Исто така, се препорачува да не се вознемируваат морските видови што може да се забележат во близина на брегот.
Институтот истакнува дека ваквите феномени укажуваат на потребата од зачувување на морскиот екосистем и ги повикува сите учесници во сообраќајот на море да ги почитуваат правилата и да не се приближуваат кон животните што се забележани во водата.
Институтот за морска биологија ги замоли сите сопственици на спортски и рекреативни пловила да бидат исклучително внимателни. Особено се нагласува важноста на намалувањето на брзината на движење и избегнувањето на какво било приближување кон животното, за да не се вознемири или повреди китот.
