На уникатен и возбудлив начин, нуркачите од нуркачкиот центар „Амфора“ од Охрид ја одбележаа традиционалната прослава на Старата нова година. Под водите на Охридското Езеро, тие организираа настан што ги спојува православните обичаи со магијата на нивната професија.
Нуркачите од „Амфора“ кај Музејот на вода на препознатлив и атрактивен начин го запалија василичарскиот оган под вода, симболично означувајќи го почетокот на Старата нова година. Овој необичен ритуал привлече внимание со својот уникатен пристап, кој го спојува богатото културно наследство со подводните авантури.
На богатата трпеза се најдоа колбаси и пиво во стаклени шишиња.
Со овој несекојдневен чин, нуркачите од „Амфора“ упатија честитки до сите православни христијани, посакувајќи им среќна Стара нова година и празнично расположение за Василица, Богојавление, Водици и Св. Јован Крстител – Денот на рибарите.
