Силно невреме, проследено со обилни и поројни дождови, предизвика хаос и значителна материјална штета во многу места во северозападна Грција. Според последните извештаи, цели населби се под вода, подрумите и приземјата на куќите се поплавени, а силните буици носеле автомобили по улиците.
Грчката метеоролошка служба објави шокантни податоци – во областа околу градот Јанина, само во рок од неколку часа, паднале околу 280 милиметри дожд. Оваа енормна количина на вода предизвика активирање на свлечишта кои блокираа клучни патни правци, парализирајќи го сообраќајот во регионот.
Крф во критична состојба: Село со 2.000 жители целосно изолирано
Особено тешко е погоден популарниот туристички остров Крф. Локалните власти ја опишуваат ситуацијата како драматична, со делови од островот кои се целосно недостапни за спасувачките екипи.
Најкритично е во селото Карусадес, каде живеат околу 2.000 луѓе.
„Селото Карусадес е отсечено од остатокот од светот. Дури и полициската станица е блокирана од тони кал,“ изјави началникот на општината Северен Крф во изјава за весникот „Катимерини“.
Властите итно побарале помош од централната власт. Се очекува пристигнување на работни машини и тешка механизација од другите делови на Грција за да се овозможи расчистување на земјата и калта што ги затрупала патиштата. Голем дел од патната инфраструктура на островот е или блокирана или уништена.
Поради безбедносни ризици, донесена е одлука сите училишта во погодените подрачја да останат затворени во понеделник.
Последица од пожарите во 2023 година
Експертите укажуваат на директна поврзаност помеѓу сегашните поплави и еколошките катастрофи од минатото. Метеоролозите сметаат дека разорната моќ на сегашните поплави е значително зголемена поради недостатокот на вегетација.
Имено, во 2023 година, северниот дел на Крф беше зафатен од голем шумски пожар кој уништи огромни површини шума. Без дрвја и растенија кои би ја задржале водата и почвата, дождот сега непречено создава свлечишта од кал и камења, предизвикувајќи многу поголеми штети отколку вообичаено.
Според прогнозите, се очекува дождот да продолжи да паѓа во погодениот регион и во текот на денешниот ден, но со намален интензитет во споредба со вчерашниот „потоп“.
