Коалицијата ВЛЕН денеска изрази жалење за, како што велат, пристапот на министерката за образование, Весна Јаневска, кон албанскиот јазик.
Според ВЛЕН, министерката вчера, за време на јавен настап, во два или три наврати изразила незадоволство кога градоначалникот на Тетово, Билал Касами, комуницирал на албански јазик со новинарите од медиумите на албански јазик.
„Поради оваа причина, ВЛЕН изразува жалење за ваквиот пристап на министерката Јаневска кон албанскиот јазик и во оваа прилика нагласуваме дека таков став е во спротивност со духот на почитување и соживот што треба да го отелотворува секој претставник на државните институции“, се вели во реакцијата.
Од коалицијата посочуваат дека министерката не требало да биде фрустрирана затоа што не го разбира јазикот.
„Наместо да се чувствува лошо што г-дин Касами зборува македонски како и албански, додека таа – и покрај тоа што живее во повеќејазична средина – не знае ниту еден збор на албански јазик, министерката Јаневска реагираше затоа што не разбираше албански јазик“, велат од ВЛЕН.
Тие додаваат дека во едно демократско и мултиетничко општество, дури и странските дипломати кои престојуваат во земјата учат албански.
„Да бидеш министер, па дури и министер за образование, а да не знаат ниту еден збор од јазикот на сограѓаните Албанци и да реагираат на употребата на албанскиот јазик, ова е тешко да се преведе во услови на коегзистенција, граѓанство и почитување на другите во едно мултијазично општество“, стои во соопштението.
Од ВЛЕН заклучуваат дека почитувањето на јазиците што се зборуваат во оваа земја е почитување на граѓаните и на самата држава, и дека тие остануваат посветени на институционална култура која промовира коегзистенција.
