Владејачката ВМРО-ДПМНЕ прогласи убедлива победа уште во првиот круг од вчерашните локални избори, освојувајќи градоначалнички места во 32 општини низ државата. Според првичните неофицијални резултати од обработени 99,94% од гласовите, опозициската СДСМ доживеа тежок пораз, победувајќи во само три општини. Во албанскиот политички блок, коалицијата ВЛЕН освои пет градоначалници, додека коалицијата НАИ предводена од ДУИ обезбеди четири.
Кандидатите на ВМРО-ДПМНЕ победија во низа клучни градови, меѓу кои и Берово, Битола, Велес, Гевгелија, Кавадарци, Охрид, Прилеп, Струмица и Штип, како и во повеќе скопски општини како Бутел, Гази Баба, Ѓорче Петров и Кисела Вода.
Од друга страна, Социјалдемократскиот сојуз успеа да обезбеди победа само во три општини: Богданци, Крива Паланка и Кривогаштани, што претставува еден од најслабите изборни резултати за партијата.
Во трката меѓу албанските партии, коалицијата ВЛЕН победи во Арачиново, Желино, Сарај, Чаир и Теарце. Коалицијата НАИ, предводена од ДУИ, се избори за градоначалници во Гостивар, Липково, Пласница и Чашка.
Изборниот процес не успеа во три општини – Центар Жупа, Врапчиште и Маврово Ростуше. Во овие општини не беше исполнет законскиот цензус за излезност од најмалку една третина од запишаните избирачи, што значи дека таму ќе се повтори гласањето.
Неизвесно останува во Старо Нагоричане, каде кандидатот на ВМРО-ДПМНЕ, според досегашните податоци, има освоено точно 50% од гласовите, што е на самата граница за победа во прв круг.
Во останатите општини каде што ниту еден кандидат не освои над 50% од гласовите и каде беше исполнет цензусот, ќе се одржи втор круг на гласање за две недели.
