Денеска започнува судскиот процес за трагедијата во кочанскиот ноќен клуб „Пулс“, каде на 16 март 2025 година во катастрофален пожар загинаа 63 лица.
Процесот што ја потресе државата добива своја судска епилог, а 4NEWS.mk ќе пренесува во ЖИВО од судницата во Идризово.
Обемниот обвинителен акт, поднесен од ОЈО Кочани, опишува повеќедецениски синџир на негрижа, свесни пропусти и корупција, кој започнува од сопствениците на клубот, преку локалната власт, па сè до врвот на неколку државни институции и министерства.
Во обвинението се опфатени 34 физички и 3 правни лица, кои се товарат за делото „Тешки дела против општата сигурност“. Деталите од обвинителниот акт укажуваат на сериозни пропусти во повеќе нивоа на системот:
1. Сопствениците и менаџерите – нелегална градба, запаливи материјали, безбедносни пропусти
Од фактичкиот сопственик Дејан Јованов, до инженери и менаџери, обвинението наведува дека клубот бил реконструиран без одобрение, притоа користејќи лесно запаливи материјали и без елементарна заштита од пожар. Објектот имал само еден излез и без функционални хидранти, што според обвинителството придонело за брзото ширење на огнот и неможноста за евакуација.
2. Обезбедувањето – работа на црно и пропуштен контролен пункт
Агенцијата за обезбедување и нејзините вработени се обвинети дека немале договор со клубот, не направиле проценка на ризик и не извршиле контрола на посетителите, со што дозволиле внесување пиротехнички средства и влез на малолетници.
3. Општина Кочани – три генерации градоначалници кои „мижеле“
Три поранешни градоначалници и неколку градежни инспектори се товарат дека со години знаеле дека „Пулс“ работи како дивоградба, но не презеле ниту една мерка за негово затворање.
4. Државни институции – директори, министри и инспектори со пропусти
Од Дирекцијата за заштита и спасување, преку Министерството за економија, до Државниот пазарен инспекторат – обвинението посочува системска негрижа, незаконско издавање лиценци и дури фалсификувани службени документи.
5. Корупција – мито од 226.000 денари
Еден од обвинетите, службеник во Министерството за економија, се товари за примање мито и фалсификување документи во замена за нелегална лиценца за работа на клубот.
4NEWS.mk е на лице место во судницата во Идризово.
Го следиме развојот на настаните во ЖИВО, минута по минута ТУКА
