Првата светска забрана за користење социјални мрежи за лица помлади од 16 години не ги дава очекуваните резултати во Австралија, покажува ново истражување на тим кој ја советувал владата при воведувањето на мерката.
Според анализата, интернет платформите не успеваат да спроведат основни проверки на возраста на корисниците, поради што голем број малолетници и понатаму можат да пристапат до социјалните мрежи.
Австралискиот закон за социјални мрежи, кој стапи на сила во декември 2025 година, им наложува на платформи како Инстаграм, Снепчет и Јутјуб да спречат отворање профили од лица помлади од 16 години. Компаниите се обврзани да преземат мерки за спроведување на забраната, а владата им препорача користење повеќе методи за проверка на возраста.
Сепак, мерката наиде на критики откако истражувањата покажаа дека најголем дел од лицата под 16 години сè уште можат да користат социјални мрежи. Поради тоа, австралиските власти минатиот месец ги удвоија максималните казни и ги предупредија технолошките компании дека може да се соочат со судски постапки доколку не го почитуваат законот.
Тест-профили поминале без проверка
Тим од софтверски тестери утврдил дека ниту една од проверуваните платформи не побарала доказ за возраста при отворање на 50 тест-профили креирани по стапувањето на законот во сила, при што била наведена возраст од 16 години.
Сите профили останале активни на девет од десетте платформи опфатени со забраната.
Истражувачите посочуваат дека главниот проблем е почетната проверка, која ја проценува возраста врз основа на активноста на корисниците на интернет, но не успева да ги идентификува помладите лица за кои би требало да се воведе дополнителна проверка.
„Од корисниците треба да се бара да докажат колку години имаат, но ниту еднаш не ни беше побарана проверка на возраста или користење систем за потврда на возраст“, изјави Ендру Хамонд, директор на компанијата за тестирање KJR, која го спроведе првото истражување во 2025 година.
Само една платформа побарала доказ за возраста
Единствената платформа која побарала доказ за возраста пред отворање профил била австралиската платформа „Kick“.
Од компанијата „Мета“, која ги поседува Инстаграм и Фејсбук, соопштија дека дополнителна проверка на возраста се спроведува кога однесувањето на корисникот укажува дека можеби станува збор за малолетно лице или кога профилот е пријавен.
Од компанијата нагласија дека тестирањето не било спроведено според упатствата на регулаторите, бидејќи тест-профилите биле пријавени како профили на корисници постари од 16 години и не било докажано дека се однесувале како вистински малолетни лица.
Австралискиот регулатор за интернет-безбедност порача дека и понатаму верува оти платформите располагаат со потребната технологија и ресурси за спроведување на забраната.