Несекојдневниот гостин во венецијанската лагуна, добриот делфин по име Мимо, кој ги забавува туристите и локалното население со своите акробации, предизвика голема загриженост. Неговото присуство во близина на Плоштадот Свети Марко покрена кампања за негово спасување поради опасноста од густиот бродски сообраќај, пишува The Guardian.
Мимо последен пат беше виден завчера во базенот Свети Марко, водна површина пред истоимениот плоштад. Додека со своите скокови ги воодушевуваше минувачите, активистите за заштита на животните стравуваат дека би можел да биде усмртен од пропелерите на бродовите кои непрестајно пловат во прометната лагуна. Неговата навидум бестрашна природа привлече и несакано внимание – некои наводно му фрлале топки или го прогонувале со чамци, а се организираат дури и таканаречени „селфи тури“.
„Ова животно не е туристичка атракција, тоа е диво животно кое треба да се премести во поздрава околина“, изјави Кристина Ромиери, иницијатор на кампањата „Спасете го делфинот“. Ромиери додава дека делфинот можеби може да преживее во лагуната, но „базенот“ Свети Марко, каде што „поминуваат водни таксиња, паробродите и сѐ останато“, претставува исклучителна опасност.
Експертите и крајбрежната стража на готовност
Делфинот е следен од експерти од Certa, тим за итни интервенции за морски животни од Универзитетот во Падова, заедно со персоналот на крајбрежната стража. Нивната цел е да му помогнат безбедно да се врати на отворено море. Крајбрежната стража издаде предупредување до сите пловила да одржуваат минимално растојание од 50 метри ако го забележат животното.
Мимо првпат го забележа Мануел Тифи, возач на водно такси, уште на 23 јуни. Во октомври, тој изјави дека делфинот често пливал „токму пред лакот“ и дека возачите на такси пријавувале видувања за да ги предупредат другите да бидат внимателни. „Но, се чини дека животното нема страв“, додаде Тифи.
Добрите делфини се најчестиот вид во италијанските води, а иако вообичаено се движат во јата, последниве години се забележани повеќе случаи на осамени единки во Јадранот. Гвидо Пиетролуонго, истражувач во Certа, ја објаснува можната причина за доаѓањето на Мимо.
„Тоа е диво животно“
„Тоа се класични делфини кои ги следат рибарите во северниот Јадран. Веројатно е дека тие животни, следејќи го својот плен, се одвојуваат од групата и се наоѓаат во околини каде што е присутна човечка активност“, рече тој. Пиетролуонго истакнува дека лагуната е богата со риба, што му обезбедува храна на делфинот. „Параметрите на лагуната се многу слични на оние на морето, со тоа што лагуната е полна со риба.
Значи, ова животно е во лагуната бидејќи јаде, инаку би умрело по една недела“, додаде тој. Напомена дека Мимо е вешт навигатор, но клучно е да не се попречува. „Кога би виделе лав насред Плоштадот Свети Марко, никој не би ни сонувал да му пријде и да го прегрне. Истото е и со делфинот, сите го гледаат како пријател, но тоа е диво животно“, заклучи Пиетролуонго.
