Украинскиот претседател Володимир Зеленски повика на „вистински притисок“ врз Русија да ги запре нападите врз Украина.
„Дури и покрај меѓународните дипломатски напори да се стави крај на војната, Русија продолжува да убива цивили“, рече Зеленски. „Ова значи дека Путин не се плаши од ништо.
Тој нагласи дека мора да има целосен и безусловен прекин на нападите и дека Русија мора да се согласи на тоа. „Оваа војна мора да заврши праведно. А за вистински да ја гарантираме безбедноста на нашиот народ, мора дополнително да го зајакнеме нашиот штит за противвоздушна одбрана“, рече украинскиот претседател.
„Соработката меѓу земјите кои ги ценат луѓето и животот мора да ги запре сојузите на убијците“, додаде тој.
Зеленски: Русија употреби севернокорејска балистичка ракета во нападот на Киев
Зеленски рече дека прелиминарните информации покажуваат дека во рускиот воздушен напад врз Киев била користена балистичка ракета произведена во Северна Кореја. Во нападот загинаа најмалку 12 лица.
„Во Киев, урнатините се уште се расчистуваат по рускиот ракетен напад“, рече Зеленски, додавајќи дека спасувачите и службите за итни случаи сè уште работат на теренот.
„Според прелиминарните информации, Русите користеле балистичка ракета произведена во Северна Кореја. Нашите специјални служби ги проверуваат сите детали“, рече тој.
Доколку се потврди дека ракетата е произведена во Северна Кореја, рече тој, тоа ќе биде дополнителен доказ за криминалната природа на сојузот меѓу Русија и Пјонгјанг. „Заедно убиваат луѓе и уништуваат животи – тоа е единственото значење на нивната соработка. Русија постојано користи такво оружје – проектили, артилерија. За возврат, Пјонгјанг добива можност да го усоврши своето оружје во реални воени услови“, рече Зеленски.