Научниците од Универзитетот во Вирџинија, САД, заедно со соработници од Германија, открија досега непозната адаптација која им овозможува на клетките на пивскиот квасец да спијат кога хранливите материи се недоволни. Откритието може да даде нови насоки во борбата против ракот, пренесува веб-страницата на образовната институција.
Способноста да хибернираат за време на стресот наликува на способноста на клетките на ракот да го преживеат недостатокот на хранливи материи што го придружува нивниот неконтролиран раст.
„Откритието може да доведе до нови стратегии за да се направат клетките на ракот поранливи на глад и полесни за лекување“, вели истражувачот Ахмад Џомаа од Медицинскиот факултет на Универзитетот во Вирџинија.
„Клетките можат да направат пауза кога ќе стане тешко, да заминат во длабок сон за да останат живи, а потоа се чини дека ќе се вратат назад. Затоа треба да ги разбереме основите на овој механизам“.
S. pombe е вид на квасец кој се користи со векови за подготовка на пиво. Тоа е исто така непроценлива алатка за истражување за научниците поради нејзината сличност со човечките клетки. Со подобро разбирање на S. pombe, истражувачите можат да добијат појасна слика за основните клеточни процеси во здравите и канцерогените клетки.
Работејќи заедно со колегите од Европската лабораторија за молекуларна биологија во Германија, американските научници открија дека кога хибернираат за да избегнат стрес, клетките на пивскиот квасец се завиткуваат во „неочекувано“ ќебе. Површината на овие батерии, познати како митохондрии, е покриена со деактивирани рибозоми – клеточни машини кои вообичаено создаваат протеини.
Зошто овие неактивни рибозоми се прикачуваат на митохондриите останува мистерија. Меѓутоа, истражувачите биле изненадени кога откриле дека тоа го прават на специфичен начин. Овој тип на интеракција не е забележан досега и може да помогне да се открие мистеријата за тоа како клетките влегуваат и се будат од хибернација.
Клетките на ракот се соочуваат со постојан недостиг на хранливи материи поради нивниот неконтролиран раст и често влегуваат во состојба на мирување за да преживеат и да избегнат откривање од страна на имунолошкиот систем. Разбирањето како тие го прават тоа би можело да доведе до нови средства за таргетирање на овие клетки, подобрување на исходот на пациентите и спречување на релапси.
„На крајот, се надевам дека нашето истражување ќе ја постави основата за откривање на нови маркери за следење на заспаните клетки на ракот“, напишаа авторите во публикацијата во списанието Nature Communications.