Премиерот Христијан Мицкоски упати остри критики за пристапот на Европската Унија кон евроинтеграцискиот пат на државата, обвинувајќи за двојни стандарди и „булинг“ од страна на земјите-членки. Во своето обраќање, тој ги критикуваше и претходните политички гарнитури, нарекувајќи ги „мекотели“, додека за македонскиот народ порача дека низ историјата „никогаш не коленичел“.
Двојни стандарди: Хрватска наспроти Македонија
Мицкоски направи паралела со хрватско-словенечкиот спор, потсетувајќи дека тогаш Европскиот Совет дозволил Хрватска прво да ги заврши преговорите и да влезе во ЕУ, па дури потоа на рамен терен, преку арбитража, да се бара билатерално решение.
Според него, ваквиот принцип не важи за Македонија.
„Таквото нешто… за нас не важеше и сè уште не важи затоа што Македонија е жртва на класичен булинг на земји-членки коишто од внатре го уценуваат интегрирањето во рамките на Европската Унија“, истакна Мицкоски, додавајќи дека напредокот не се цени реално, туку според тоа дали ќе се сменат Уставот, знамето и банкнотите.
Удар кон претходните власти: „Нема поголемо зло од корумпирани лидери“
Премиерот порача дека нацијата мора да биде мудра и да не носи избрзани одлуки под притисок. Тој директно ги обвини претходните политички гарнитури за актуелната незавидна состојба:
„Затоа за еден народ и една нација, нема поголемо зло од корумпирани т.н. лидери на таа нација, мекотели… коишто нѐ доведоа до оваа ситуација во којашто денеска се наоѓаме“.
Заглавени во Х и ХI век наместо во иднината
Мицкоски го нагласи апсурдот на преговарачката рамка, бидејќи наместо да се разговара за европски стандарди, фокусот е ставен на историски прашања од средниот век.
- Ние денеска преговараме за билатерални прашања кои не водат никаде, наместо за вредности и владеење на правото.
- Тој посочи дека државата се враќа назад во 10-от и 11-от век за да толкува чии биле тогашните учители и ученици, иако нема живи сведоци од тоа време за да ја кажат вистината.
„Овој народ никогаш не коленичел“
На крајот, тој порача дека македонскиот народ има своја вековна традиција и култура, секогаш бил на вистинската страна на историјата и ја бранел вратата на Европа.
Иако историски народот честопати бил на грб во востанијата, тој „никогаш не коленичел“ и неговото природно место, како и местото на државата, е токму во Европа.