Иновативна медицинска процедура изведена во Кина овозможила значително намалување на голем тумор кај неродено бебе, без хируршко отворање на матката. Лекарите користеле микробранова енергија за да го уништат ткивото додека бебето сè уште било во утробата.
Бебето имало конгенитална пулмонална малформација, позната како ЦПАМ, која според лекарите се јавува кај приближно една од 25.000 до 35.000 бремености.
Во најголем број случаи состојбата не претставува сериозна опасност, но кај мал број фетуси малформацијата може да расте исклучително брзо. Доколку достигне големи димензии, може да изврши силен притисок врз срцето и белите дробови на бебето, што во најтешките случаи може да доведе и до смртен исход.
За ЦПАМ не постои единствен третман кој се применува кај сите пациенти. Во одредени случаи, на мајката може да ѝ бидат дадени стероидни лекови со цел да се намали туморот.
Кај ретки случаи во кои малформацијата претставува голема циста исполнета со течност, лекарите може да постават игла преку стомакот и матката на мајката, а потоа да вметнат цевка за дренажа меѓу цистата и воденикот околу матката. Сепак, кај значителен број случаи со ваква дренажа е забележано предвремено породување.
Друга можност е феталната лобектомија – хируршка процедура при која се отвора матката за да се отстрани туморот од фетусот, по што бебето се враќа во утробата. Станува збор за голема операција, а според истражување на Универзитетот во Калифорнија, Сан Франциско, преживуваат околу 50 отсто од бебињата родени од мајки кои биле подложени на оваа процедура.
Во најновиот случај, кинеските лекари примениле минимално инвазивен пристап кај 40-годишна бремена жена. Во 22. гестациска недела, туморот кај фетусот достигнал околу пет сантиметри и почнал да врши притисок врз срцето и белите дробови. Кај бебето било забележано и опасно наталожување течност во стомакот.
Наместо да извршат отворена операција, лекарите поставиле мала игла преку стомакот на мајката директно во малформацијата. Потоа преку иглата испорачале микробранова енергија, со која го загреале и уништиле абнормалното ткиво.
Методот се заснова на создавање интензивна топлина преку вибрирање на молекулите на водата, со што ткивото се уништува однатре.
Резултатите биле забележливи само три дена по интервенцијата. Туморот значително се намалил, а течноста што се насобрала во стомакот на бебето целосно исчезнала.
Бебето било родено во 37. гестациска недела со царски рез, со тежина од околу 2,9 килограми.
Лекарите го опишуваат случајот како важен чекор, бидејќи станува збор за прва забележана употреба на микробранова аблација за лекување на фетална ЦПАМ.
Сепак, тие предупредуваат дека и покрај ветувачките резултати, безбедноста и ефикасноста на методот не можат да се потврдат врз основа на само еден случај.
Доколку понатамошните испитувања покажат дека процедурата е безбедна, применлива и ефикасна, таа би можела да стане дополнителна опција за лекување на тешките случаи на ЦПАМ.