Невидена сцена се случила на детско игралиште во скопската населба Капиштец, каде 10-годишно дете било каснато од глушец додека си играло со други деца, објави телевизија Сител. Инцидентот, кој резултирал со раскрвавена рака кај детето, доаѓа во време кога Скопје се соочува со огромна криза со ѓубрето, а јавното претпријатие „Комунална хигиена“ е под истрага.
Според извештајот, детето било нападнато од глодарот среде игралиште, што претставува директна последица на лошата хигиена и преполните контејнери кои со денови ги преплавуваат скопските улици и населби. Градот буквално се претвора во депонија, а граѓаните стравуваат од ширење на зарази.
Во отсуство на редовни услуги од „Комунална хигиена“, градоначалниците на дел од скопските општини веќе почнаа да организираат акции за чистење со сопствена механизација, обидувајќи се барем делумно да ја санираат состојбата.
Во меѓувреме, директорот на ЈП „Комунална хигиена“ е недостапен за јавноста, а институционалната криза во претпријатието кулминираше со вчерашната акција кога полицијата и обвинителството влегоа во просториите на претпријатието, спроведувајќи истрага за можни злоупотреби. Инцидентот со каснатото дете е само најнов, алармантен показател за сериозноста на ситуацијата и итната потреба од решение.
