Најновата анкета на јавното мислење презентирана вечерва од јавниот сервис открива слика на длабоко поделено македонско општество во однос на перцепцијата за сегашната состојба во државата, но со преовладувачки умерен оптимизам кога станува збор за очекувањата за иднината.
Речиси половина од граѓаните очекуваат подобар живот.
На прашањето каков ќе биде животот во Македонија во наредните неколку години, речиси половина од испитаниците, или
48.1%, изразиле оптимизам. Од нив,
19.7% сметаат дека животот многу ќе се подобри, додека 28.4% очекуваат тој донекаде да се подобри. Од друга страна, вкупно
21.3% се песимисти, сметајќи дека животот донекаде (10.8%) или многу (10.5%) ќе се влоши. Дека состојбата ќе остане иста сметаат
19.4% од граѓаните.
Поделеност околу насоката на државата
Анкетата покажува речиси изедначени табори на прашањето во каква насока се движи Македонија. Вкупно
47% од граѓаните сметаат дека државата оди во погрешна насока, од кои 29.8% се сигурни дека е целосно погрешна, а 17.2% дека е донекаде погрешна. Спротивно на нив, вкупно
44.6% веруваат дека насоката е правилна (14.0% целосно и 30.6% донекаде).
Дали се живее подобро од минатото?
И во однос на споредбата на сегашниот живот со оној од пред неколку години, граѓаните се поделени. Мало мнозинство од
40.7% смета дека животот денес е подобар (19.1% многу подобар и 21.6% донекаде подобар). Дека се живее полошо сметаат вкупно
33.9% од испитаниците (16.3% донекаде полошо и 17.6% многу полошо). Интересен е податокот дека дури
21.7% од граѓаните не гледаат никаква промена и сметаат дека животот е ист.
Анкетата е спроведена телефонски на 1126 испитаници во месец септември.
