Поранешниот американски претседател и републикански лидер Доналд Трамп предупреди на можноста од трета светска војна под сегашното раководство во Вашингтон, велејќи дека доколку биде избран ќе го промени курсот.
Говорејќи на кампањата во Детроит, Трамп истакна дека не започнал нови конфликти за време на неговиот мандат 2017-2021 година и вети дека ако добие втор мандат, ќе работи на враќање на мирот, особено во Украина.
Трамп тврди дека „слабоста и неуспехот на Џозеф Бајден“ ги става САД во „сериозна опасност“ и „нѐ турка кон Трета светска војна“, сугерирајќи дека тој направил поголема штета на земјата отколку десетте најлоши претседатели во историјата на САД заедно.
– Имаме многу проблеми во оваа земја, згора на тоа, би можеле да завршиме и во трета светска војна бидејќи имаме неспособен лидер кој никогаш не требаше да биде на таа позиција – нагласи тој.
Претходно овој месец, републиканскиот лидер предупреди дека светот може да биде втурнат во разорна нуклеарна војна поради наводниот ментален слом на Бајден. Во изјавата за водителот на Fox News, Шон Ханити, Трамп посочи дека за разлика од лидерите на Русија, Кина и Северна Кореја, Бајден „не е на врвот на својата игра“ и никогаш не бил „светилник“ меѓу американските политичари.
Трамп предупреди дека нуклеарната војна може да доведе до „уништување на светот“ и нагласи дека САД во моментов имаат лидер кој „не може ниту да зборува“ за ова прашање.
За време на неговиот говор во Детроит, претседателскиот кандидат, исто така, ја критикуваше администрацијата на Бајден за „трошење пари на нивоа досега невидени“, особено кога станува збор за континуираната финансиска поддршка за Украина, и го нарече Володимир Зеленски „најголемиот бизнисмен што некогаш живеел“.
– Секогаш кога доаѓа во нашата земја се враќа со 60 милијарди долари – рече Трамп и додаде дека Зеленски секогаш кога ќе добие пари, веднаш бара повеќе.
– Никогаш не завршува – нагласи тој и вети дека прашањето ќе биде „решено“ пред тој повторно да ја преземе функцијата претседател.
Претходно Трамп рече дека конфликтот во Украина „никогаш немаше да се случи“ доколку тој беше претседател во тоа време и рече дека би можел да го прекине за 24 часа доколку добие уште еден мандат во ноември. Сепак, тој не прецизираше како ќе ја постигне таа цел.
