„Нека биде искрен Дејан и нека каже дали тој од мене некогаш барал целосен проект?“
Со овој директен предизвик упатен кон првообвинетиот Дејан Јованов – Деко, петтообвинетата инженерка Милка Едровска ја негираше својата вина за трагедијата. Таа се огради од клучниот фактор за брзото ширење на пожарот – внатрешното уредување и материјалите.
„Не сум јас изготвувачот на внатрешното уредување. Не сум бирала јас какви материјали ќе бидат употребени во внатрешноста“, децидно изјави Едровска пред судот.
Таа тврди дека нејзината улога била минорна и се однесувала само на сообраќајот, а не на градбата или безбедноста на објектот. „Не сум била надзор, не сум била присутна воопшто, освен во 2012 година кога сѐ беше веќе направено и од мене беше барано само сообраќајно решение и толку“, додаде таа.
Ова обраќање доаѓа откако нејзиниот адвокат претходно откри дека вистинскиот проектант на ентериерот наводно бил друг архитект, кој не е опфатен со обвинението.
ЗА ШТО СЕ ТОВАРИ МИЛКА ЕДРОВСКА?
(Според Обвинителниот акт КО бр. 180/2025)
Иако таа тврди дека работела само на сообраќајно решение, Обвинителството ја товари за „Тешки дела против општата сигурност“ со сериозни наводи:
- Дека изготвила документ насловен „Основен проект“ кој не ги содржел задолжителните фази (статика, електрика, машинство, заштита од пожари).
- Дека во 2023 година, без да изврши увид на лице место, на стариот проект само ја сменила насловната страница и датумот, претставувајќи го како нов, за да му овозможи на Дејан Јованов да добие лиценца .
- Дека изготвила сообраќајно решение со паркинг места нацртани на државно земјиште.
