На поранешниот американски претседател Џо Бајден му е дијагностициран рак на простата, соопшти неговиот кабинет вечерва.
На Бајден, 82, му беше дијагностицирана болеста во петокот откако минатата недела посети лекар поради проблеми со уринарниот систем.
Ракот се карактеризира со Глисонов скор од 9 со метастази во коските, се вели во соопштението, што значи дека станува збор за поагресивна форма на болеста.
Додадено е дека Бајден и неговото семејство моментално разгледуваат опции за лекување. Кабинетот на поранешниот претседател, исто така, изјави дека ракот е хормонски чувствителен, што значи дека веројатно може да се држи под контрола.
Тој беше најстариот претседател на САД досега.
Веста доаѓа речиси една година откако Бајден беше принуден да се откаже од претседателската трка во 2024 година поради загриженост за неговото здравје и возраст. Тој е најстарата личност што некогаш била претседател на Соединетите Американски Држави.
Бајден, тогашен демократски кандидат кој се кандидираше за реизбор, се соочи со растечки критики за неговиот слаб настап во телевизиската дебата во јуни против републиканскиот кандидат и актуелен претседател Доналд Трамп. Тој беше заменет од потпретседателката Камала Харис како кандидат на Демократската партија.
Според „Cancer Research UK“, дијагнозата на рак со Глисонов скор од 9 значи дека болеста е класифицирана како „висок степен“ и дека клетките на ракот може брзо да се шират.
За неговата здравствена состојба се шпекулира со години.
За време на претседателскиот мандат на Џо Бајден (2021–2025), неговото здравје и когнитивните способности беа предмет на зголемени критики и загриженост, особено во контекст на неговата одлука повторно да се кандидира на изборите во 2024 година.
Книгата „Првичен грев“ од новинарите Џејк Тапер и Алекс Томпсон открива дека помошниците на Бајден намерно ги прикривале знаците на неговиот физички и ментален пад, вклучително и заборавањето на имињата на блиски соработници и познати личности како Џорџ Клуни, како и размислувањето за користење инвалидска количка поради проблеми со одењето. Книгата ќе биде објавена на 20 мај.
Загриженоста дополнително се зголеми по објавувањето на аудио снимки од 2023 година, на кои Бајден, за време на испрашувањето од страна на специјалниот советник Роберт Хер, покажува тешкотии да се сети на клучни датуми и настани, вклучително и смртта на сопствениот син.
Хур во својот извештај навел дека Бајден ќе се појави пред поротата како „добронамерен постар човек со лоша меморија“, што предизвикало политички последици во рамките на Демократската партија.
По слабиот настап на дебатата со Доналд Трамп во јуни 2024 година, Бајден се откажа од трката за втор мандат во јули истата година, поддржувајќи ја тогашната потпретседателка Камала Харис, која последователно ги загуби изборите од Трамп.
Покрај здравствените проблеми, администрацијата на Бајден се соочи со афера поради неправилно ракување со класифицирани документи, пронајдени во неговите приватни простории. Иако против него не беа подигнати обвиненија, истрагата дополнително ја поткопа довербата на јавноста во неговата способност да ги извршува своите должности.
За време на неговиот мандат, Бајден беше познат по бројни вербални гафови, вклучително и мешање на имиња на светски лидери и давање несмасни изјави, што дополнително ги разгоре сомнежите за неговата ментална способност да служи како претседател.
