Јапонски планинар загина додека се искачувал на планина на северот на Пакистан, додека друг е исчезнат и се трага по него, соопштија денеска официјални лица.
Секретарот на Алпскиот клуб на Пакистан, Карар Хаидри изјави дека спасувачите го извлекле телото на еден од двајцата исчезнати јапонски планинари, по повеќедневна операција за пребарување на врвот Спантик.
Планинарите исчезнаа во средата.
Хаидри рече дека пакистанските власти се во контакт со јапонската амбасада во Исламабад за да го потврдат идентитетот на загинатиот планинар.
Пакистанскиот алпски клуб претходно соопшти дека двајцата Јапонци кои исчезнаа во средата додека се обидуваа да стигнат до врвот Спантик висок 7.027 метри се Риусеки Хираока и Ацуши Тагучи.
Секоја година во Пакистан умираат голем број алпинисти обидувајќи се да стигнат до врвовите на некои од највисоките планини во светот, вклучително и К2, втора највисока во светот, лоцирана во северен Пакистан.
